MENU
thesari.com © 2001

Gëlbaza kundër kujtdo që cënon idetë e udhëheqësit që të përkëdhel - Thesari

E Dielë 19 Mars, 2017
Gëlbaza kundër kujtdo që cënon idetë e udhëheqësit që të përkëdhel

valbona-maloku-xhavit-seferi-xhafaj

Gazeta “Tema” publikon sot një investigim ku pretendohet se kane zbuluar se Xhavit Seferi dhe Valbona Maloku rezultojnë me një të kaluar të errët kriminale, nga akuzat për përfshirje në trafiqe kriminale deri edhe vrasje. Janë  këto dy personazhet që kanë adresuar në publik akuza të rënda ndaj Fatmir Xhafaj që Rama e emëroi Ministër të Punëve të Brendshme, por në të kaluarën e tij ka qënë hetues në shërbim të sistemit komunist të Enver Hoxhës. Ata kanë denoncuar dhunën dhe metodat që ky ish hetues komunist ka përdorur ndaj tyre por kjo nuk i shkon për shtat me sa duket shërbëtorëve te Rilindjes dhe idealeve qe ata përfaqësojnë.

Ja çfarë shkruan Tema e Mero Bazes në zbulimin që ka bërë ndaj "armikut të klasës"

Qysh nga dita e parë që kryetari i Komisionit të Reformës në Drejtësi u caktuar si ministër i ri i Brendshëm, Partia Demokratike, Sali Berisha dhe media pranë saj filloi avazin e zakonshëm.
Shpif e shpif se dicka do të mbetet. Balta nuk kurseu as Fatmir Xhafaj e as familjen e tij.

Sigurisht, jo vetëm si një nga deputetët më me përvojë në Parlamentin e Shqipërisë, por dhe si një armik i përbetuar i Sali Berishës, Fatmir Xhafaj ishte një problem më shumë për opozitën, e cila pas largimit të Saimir Tahirit shpresonte se karrigen e ministrit të Brendshëm do e zinte një teknicien.

Në këtë aspekt, Fatmir Xhafaj jo vetëm është edhe më politik se Tahiri, por si arkitekti i reformës në drejtësi, ai kishte krijuar armiqësi të pazakontë me të gjithë ata që sot përpiqen ta ndalojnë reformën.

Sot gazeta TemA vjen me një investigim të kryer për personat që gjatë javës së fundit kanë hedhur baltën mbi Fatmir Xhafaj për të kaluarën e tij.

Bëhet fjalë për dy persona: Xhavit Seferi dhe Valbona Maloku.

Xhavit Seferi ka lindur në 18 korrik 1969 në fshatin Cudhi Kamit, Krujë.

Në vitin 2003 ka ndryshuar mbiemrin nga Kani në Seferi, edhe pse në Krujë njihet edhe me mbiemrin Koni.

Në 19 shkurt 2009, Xhaviti është arrestuar në flagrancë, pasi ka shkaktuar aksident automobilistik duke plagosur dy persona, ndërkohë që dy muaj më vonë është proceduar penalisht pasi ka kërcënuar me jetë një polic rrugor gjatë një tjetri aksidenti me pasoja.

Në 20 maj 2010, Xhavit Koni është dënuar në Maqedoni nga Gjykata e Shkupit me arrest në burg për 15 vjet, pasi akuzohet për trafikim të qënieve njerëzore, si anëtar i një grupi të strukturuar kriminal.

Në 15 nëntor 2011, është shpallur në kërkim për plagosje me thikë të kushëririt të tij, Fatbardh Kani, dhe vetëm një vit më vonë, kushëriri ka marr hak duke tentuar ta vrasë me armë zjarri në një atentat në mbikalimin e autostradës së Fushë Krujës.

Valbona Maloku ka lindur në 20 shkurt 1968, gjithashtu në Fushë Krujë.

Që prej vitit 1990, Valbona, së bashku me bashkëshortin dhe dy vëllezërit, janë larguar nga Shqipëria, duke hyrë në Ambasadën gjermane.

Bashkëshorti i Valbonës është vrarë në Shqipëri në vitin 1999 nga Robert Preni, ndërkohë që hakmarrja e Valbonës mendohet të ketë ardhur vetëm 3 vjet më vonë, duke vrarë vëllain e Robertit, Antonin.

Ajo cka e bën edhe më të frikshme historinë e Valbonës, është se ajo dyshohet të ketë urdhëruar vrasjen edhe të një prej vëllezërve të saj, Arben Duka, për të cilin tani derdh lot krokodili.

Ndonëse të dhënat flasin vetë, është e qartë se personat që sot hedhin baltë mbi Fatmir Xhafaj, janë njerëz që fillimisht duhet të përgjigjen para drejtësisë për vrasjet, vjedhjet dhe krimet që kanë kryer jo larg në kohë, por gjatë 20 viteve të fundit.

Jep një mendim
Komentet publikohen direkt pa censurë. Mundohuni ti përshtateni etikës së komunikimit.*
* Administratori rezervon te drejten per te edituar ose fshire komentet
A keni besim se qeveria Rama 2 do e përmirësojë jetën tuaj?