Ish-kryeministri, Sali Berisha, e ka cilësuar “akt banditesk shtetëror të pashembullt në Europën e sotme”, vendimin për shembjen e një pallati në Vlorë.
“Me urdhër të Edi Rames, Policia në kundërshtim me Kushtetutën dhe ligjet e vendit, si një bande socialiste, prej më shumë së 24 orësh ka rrethuar me shiritin e zonës së krimit një pallat në qytetin e Vlorës. Ajo nuk lejon banorët e pallatit të hyjnë në apartamentet e tyre ku banojnë dhe që i kanë të blera e hipotekuara në përputhje me të gjitha ligjet e vendit”, shprehet Berisha.
Sipas tij, “pallati është ndërtuar me leje, në pronë privatë, me kredi bankare dhe është hipotekuar konform rregullave të shtetit”, ndërsa e cilëson vendimin për prishjen e ndërtesës akt urrejtje të Ramës ndaj kundërshtarit të tij politik.
“Krimi i vetëm i pallatit është se njëri nga investitorët e tij ka qenë vjehrri i kryetarit të PD-së, kundërshtarit të Edi Ramës, të cilin ky i fundit e urren për vdekje. Ndaj dhe dënon kolektivisht të gjithë banorët e pallatit”, thotë Berisha.
Kjo sjellje, shton Berisha është “dëshmi falgrante e shtetit policor të Edi Ramës, është kushtrim i vërtetë për çdo qytetar për t’u ngritur ndaj akteve shtetërore banditeske më të cilat Rama me urrejtjen e tij, të papërmbajtur dhunon Kushtetutën e vendit, Konventën Evropiane të të Drejtave të Njeriut, përdor antiligjin për të shkatërruar ligjin.”
![116015312_994146891055855_52605780694315454_n[1]](/pic/200/140/116015312_994146891055855_52605780694315454_n[1].jpg)
