Shqipëria që duam! Bilanci 4 vjeçar i Rilindjes - Thesari

Me afrimin e ditës së zgjedhjeve përfundon edhe mandati i parë i qeverisë Rama-Meta që ju shit shqiptarëve si Rilindja e madhe Kombëtare. Megjithëse peshën kryesore të këtij koalicioni e kishin socialistët me kryeministër kryetarin e tyre Edi Rama, pa asnjë skrupull të dyja partitë që qeverisën Shqipërinë për 4 vjet nuk kanë bërë asnjë bilanc të programit që premtuan para 4 vitesh dhe realizimin e tyre. Programi i emërtuar Rilindja Kombëtare u shpalos në Konventën Kombëtare të Partisë Socialiste në 20 Maj 2013 dhe përmbante disa objekteve, shumica e të cilave nuk janë realizuar.

Mos harrojmë se gjatë mandatit qeverisës kur Kryeministrin e akuzonin që është në rrugë të shtrembër. se po harxhontë paratë e shqiptarëve dhe s'po bënte asgjë për njerëzit, ai për t'ju shmangur përgjegjësisë recitonte formulën e tij: "Më gjykoni në fund të mandatit". Dhe fundi i mandatit erdhi.

Tashti shqiptarët mund të shohin dhe të kuptojnë realizimin e premtimeve boshe të Rilindjes së dështuar. Megjithëse vet Edi Rama, si kryetari i karvanit të Rilindjes, e ka pranuar dështimin dhe mosrealizimin e premtimeve të bëra në 2013, ai në vend që ti kërkoj falje 1 milion shqiptarëve që i besuan votën dhe gjithë popullit që i premtoi, në asnjë rast ai nuk i ka parë gabimet tek vetja, por gjatë gjithë mandatit fajin ja adresonte Saliut, ndërsa tashti ka drejtuar gishtin tek LSI dhe Ilir Meta si shkaktarët për dështimin e qeverisjes së tij 4 vjeçare. E gjitha kjo bëhet për arsyen e thjeshtë, sepse kërkon përsëri votat e shqiptarëve edhe për një mandat tjetër, me pretendimin se i duhen edhe 4 vite të tjera për të përfunduar me sukses reformat e premtuara, këtë radhe me sloganin "Për Shqipërinë që duam". Dhe për të siguruar pushtetin me çdo kusht, ai ka rënë dakort të bashkëqeverisë po qe nevoja edhe me "Republikën e Re" të kundërshtarit të tij politik Lulzim Basha duke zevëndësuar në këte mënyrë LSI-në me PD-në. 

Shqiptarët ndoshta i besojnë përsëri këtyre trukove dhe premtimeve elektorale të Edi Ramës dhe i japin atij timonin që ai kërkon ta mbajë i pashqetësuar vetëm, por përpara se të derdhemi tek kutitë e votimit për të vendosur fatin tonë për 4 vitet e ardhshme, le ti hedhim një sy premtimeve të bëra në 2013 dhe çfarë është bërë në këto 4 vite që shkuan.